JÆJA allir ungmennafélagar, ég ætla að segja gleðileg jól og farsælt komandi ár. 

Ég frétti það að hún Arnheiður ungmennafélagsstjóri hafi verið að kasta sér í snjósköfl, hún er alltaf svo ung... En hvað um það, ég ætlaði að blogga um snjóinn, það er ekkert að koma snjó hingað í borgina, en á Eskifirði er svo mikill snjór að maður gæti bara týnst. Svo eru bara Jól eftir 3 daga, mig langar sko einu sinni að hafa hvít Jól.

Kæru ungmennafélagar, Arnheiður ungmennafélagsstjóri hefur veitt Nökkva Nils ritstjóra réttinn á bloggsíðuni.

Vonandi verður gaman hjá okkur á blogginu.

Kær kveðja. Nökkvi

Gleðileg jól elsku ungmennafélagar

Vona að þið eigið dásamlegt ár í vændum

Sjáumst spræk á nýja árinu 

Ástarkveðjur

Adda

Hæ elskurnar mínar...

Ég vona að þið hafið það öll gott og munið að hafa það notalegt á aðventunni. 

Hef því miður ekki tíma til að blogga neitt þessa dagana enda er ég á kafi í jólaföndrinu

Meira síðar....

Adda ungmennafélagsstjóri

Amma mín hún Arnheiður varð 80 ára um helgina. Af því tilefni streymdi fjölskyldan austur á land að fagna með henni.  Það var nú aldeilis skemmtilegt Ungmennafélagar lágu ekki á liði sínu, skreyttu bæði hús og garð með blöðrum og skilti og svo var sungið.  Já okkar eigin Vala, Gauti og Nökkvi sömdu fallegan texta við lagið Yesterday sem öll barnabörnin (nema Eva sem komst því miður ekki í afmælið)  sungu svo í afmælinu af miklum glæsibrag og með gríðarlegri innlifun.  Jeminn eini hvað ég var nú stolt frænka  

Annars er ég farin að skokka eins og góðum ungmennafélaga sæmir og á www.blog.central.is/aggogaahlaupa má sjá allt um það mál

adda 

Jeminn eini hvað var gaman á Ítalíu enda félagsskapurinn frábær Það er skemmst frá því að segja að Ungmennafélag Arnheiðar sigraði eldri borgara í Limbó með glæsibrag, þó Sayd sýndi hetjulega baráttu og gríðarlega fimi en Yasmín fór með sigur af hólmi. Sumir skelltu sér jafnvel á vélnaut við mikla kátínu fjölskyldunnar.  Ísar Tandri sýndi gríðarlega takta en ekki er hægt að segja það sama um tiltekna eldri konu sem var ekki alveg jafn þokkafull en skemmti sér hins vegar konunglega og það er nú það sem mestu máli skiptir, ekki satt??? 

Eftir heimkomuna er lífið að færast í samt horf, líkamsræktin að hefjast, sem og vinnan og skólinn.  

Við Vala fórum á rúntinn í gær, þ.e. hún rúntaði með mig.  Við fórum á afleggjarann að Keili og þar ók hún um á bláu eldingunni eins og alvanur rallökumaður.  Ég vissi að hún hafði prófað að keyra áður en komst að því á miðri leið að sú ökuferð hafði aðeins verið um 5 metrar.  Í gærkvöldi var bætt um betur og brunaði stelpan 11,4 km eins og ekkert væri, yfir hóla og hæðir en þó aðallega holur    Stórskemmtilegur rúntur og glæsileg frammistaða hjá Völu  

Búið í bili, 

Adda

 

Jæja krakkar mínir. Eftir 2 daga fara ég og mín fjölskylda til Ítalíu. Fyrsti hópur fór reyndar í morgun, Guðbjörg og co sem ætla að stoppa í 2 daga í London á leiðinni.

Var einmitt að fá símtal frá Dúllu frænku og haldið ykkur nú fast.......................

fyrstu 4 daga ferðarinnar er spáð þrumum og eldingum í Duna Verde takk fyrir

Ekki kannski alveg það sem ég var búin að sjá fyrir mér, en við gerum nú bara gott úr því. Spurning um að hafa meðferðis góða bók og spil og slappa af innandyra fyrstu dagana í frábærum félagsskap.

Ciao

adda

Já ég er víst löngu komin frá Kanarí, eftir yndislega ferð.  Skutlaði mér svo austur um daginn og það var nú frábær ferð líka, hlustaði á Tinnu syngja, fór í heimsóknir, Mezzoforte, kaffihúsaferð til Fáskrúðsfjarðar (hvern hefði nú grunað það fyrir nokkrum árum) í tilefni af 16 ára afmæli Völu minnar og hitti fullt af fólki, stóru og smáu   Næst á dagskrá er svo afmælispartí Bjössa og svo auðvitað Ítalíuferð stórfjölskyldunnar sem allir hafa beðið eftir. 
Kalli fararstjóri hefur skorað á ungmennafélagið í íþróttakappleiki í Ítalíu fyrir hönd eldri borgara og nú verðum við að leggja höfuðið í bleyti.  Í hverju getum við nú keppt sem við erum nokkuð viss með að vinna  ?   Það var nú bent á að þarna væru golfvellir og svona en þau hafa Benna ofurgolfara með sér í liði svo ekki getum við keppt í því. 

Tillögur um keppnisgreinar eru vel þegnar.  Hvað segið þið um limbó

yfir og út 

adda

Nú er einn dagur eftir hér á Maspalomas með Evu og fjölskyldu.  Á morgun flýg ég til Lanzarote og þaðan til Íslands daginn eftir.  Er búin að hafa það frábært, liggja í leti, teygja úr tánum og fara næstum daglega í gönguferð með Guðrúnu.  Einn daginn labbaði ég um heilan dag og varð dáldið sólbrunnin eftir daginn, á öxlum, bringu og .... á hnánum   Er nú að jafna mig en ennþá eldrauð í kringum hnén, veit nú ekki alveg hvernig ég fór að þessu.  Eva er sæl og kát á Kanarí, syngjandi og trallandi og hlakkar mikið til að eignast nýtt systkin í haust.  Um daginn vorum við að tala um bræður og systur og ég spurði hana hvort hún vissi hver væri bróðir minn.  Hún hugsaði sig vel og vandlega um og spurði hvort það væri Almar Blær (sem er frændi hennar).  "Neeei," sagði ég, "bróðir minn heitir Egill Helgi Árnason".  Hún ljómaði eins og sól í heiði og sagði spennt, "váá, alveg eins og pabbi minn"   Henni fannst þetta frábær tilviljun. 

Bestu kveðjur til Íslands

Adda

Ég er að fara til Kanaríeyja á morgun  og það finnst mér nú ekkert sérlega leiðinlegt. Ég get reyndar ekki farið beinustu leið til Maspalomas þar sem Eva ungmennafélagi okkar býr, heldur þarf ég að fljúga annað og gista. Á morgun flýg ég til Tenerife, gisti þar og flýg svo áfram kvöldið eftir.  Á bakaleiðinni flýg ég til Lanzarote snemma morguns, gisti þar og held svo heim á leið daginn eftir.  Sumum gæti fundist þetta óskaplega mikið brölt, en ég hlakka mikið til að fá að skoða Lanzarote og Tenerife svona í kaupbæti við að hitta Evu og fjölskyldu hennar

Maður vikunnar er hin snjalla og stórskemmtilega Valgerður Kristjánsdóttir en hún var einmitt að fá niðurstöður úr samræmdum prófum í dag.  Vala stóð sig að sjálfsögðu rosalega vel og varð sér og sínu ungmennafélagi til mikils sóma
Til hamingju með það elskan mín.

... en mikið verð ég nú glöð á morgun þegar ég verð búin með síðasta verkefni annarinnar. 

Hugsanlega verða einhverjir fleiri líka glaðir því ég er sko hreint ekki búin að standa mig í að sinna fjölskyldu og vinum undanfarna mánuði. 

En það eru nú aldeilis uppi áform um að bæta úr því og fram á næsta haust stefni ég á að vera fyrirtaks selskapsdama  

En nú er að klára verkefni og svo í mat til Tinnu. 

Sjáumst  

Gemsinn minn hringdi áðan, sem í sjálfu sér eru nú ekki miklar fréttir, en í símanum var kona sem sagði:

"Hæ, nú verður þú að koma með mér í sjónvarpsþátt á morgun"   Mér svelgdist dáldið á kaffinu, enda ekki alveg vön þessu.  Hún útskýrði fyrir mér málið og endurtók beiðni sína.  Ég sagði henni að því miður kæmist ég ekki á þessum tíma þar sem ég væri að fara á námskeið einmitt á sama tíma, en óskaði henni góðs gengis. 

Eftir að samtalinu lauk fór ég að velta þessu betur fyrir mér.  Námskeiðið var nefnilega ekki alveg á nákvæmlega sama tíma þó vissulega væri stuttur tími til að fara á milli staða.  Ástæðan fyrir því að ég neitaði boðinu var kannski frekar sú að ég var dáldið smeik við að verða mér og öðrum til skammar í sjónvarpinu.  Kannski roðna bara og blána, koma ekki upp orði eða....    Já eða hvað ???? Þetta yrði ábyggilega mjög gaman og í versta tilfelli myndi ég roðna svolítið (sem er nú bara krúttlegt), stama svolítið (sem er alls ekki svo slæmt) eða koma ekki upp orði (en er ekki ágætt að vera fámáll og hógvær stundum).
Ég ákvað að herða upp hugann og láta ekki svona smáatriði koma í veg fyrir að ég upplifði eitthvað áhugavert, ég á nefnilega ekkert frekar von á að fá svona tilboð á næstunni.  Svo ég hringdi aftur og sagði: "ég kem".  

og nú sit ég hér dáldið skelkuð en líka svolítið spennt.  Ef svo ólíklega vill til að ég verði eins og apaköttur og bulli bara tóma vitleysu þá ætla ég bara að segja ykkur á mánudaginn hvaða þáttur þetta var, ef einhver ungmennafélagi rekst inn á síðuna fyrir þann tíma.

Þið hin, ekki láta hræðslu við lífið koma í veg fyrir að þið lifið því til fulls.

Ástarkveðjur

Adda        

Jahérna hér.  Nú er ég í sólarhringslöngu heimaprófi í skólanum mínum og finnst það ekki mjög skemmtilegt.  Er búin að vera mjög svo upptekin við skólann og vinnuna en eftir þetta próf á morgun, fer ég nú kannski að hafa meiri tíma til að sinna öllum vinum mínum og blogga dáldið. Vona það besta    Eitt af því fyrsta sem ég ætla að gera þegar ég hef endurheimt líf mitt er að skella mér á óperuna Mærþöll sem sýnd er í Óperunni gegn vægu gjaldi um helgina.  Meðal flytjenda er mín syngjandi systir Tinna, það getur ekki klikkað

Búið í bili

Adda skólastelpa

Maður vikunnar er hr. Gauti Nils Bernhardsson, en eins og mörgum er kunnugt fermdist hann um síðustu helgi með miklum glæsibrag.  Hann var fjölskyldu sinni og ungmennafélagi Arnheiðar til mikils sóma, var kurteis og prúður, ótrúlega glæsilegur og sagði já-ið sitt í kirkjunni hátt og snjallt

Mér hefur nú ekki gengið vel að blogga undanfarið en mér til afsökunar hef ég verið mjög mjög dugleg í vinnunni og skólanum. Ég er búin að vera að gera fullt af verkefnum í skólanum og um daginn sannaðist enn og aftur hvað er nú frábært að eiga góða að.  Ég uppgötvaði s.s. á miðvikudagskvöldi að ég átti að skila verkefni á föstudegi sem var að leggja próf fyrir 2 einstaklinga á aldrinum 6-13 ára.  Það vildi mér til happs að ég þekki einmitt frábært fólk á þessum aldri og eftir 2 símtöl var málinu reddað. Kristinn og Yasmín tóku próf og stóðu sig eins og hetjurnar sem þau eru.  Takk fyrir elskurnar. 

Þetta er nú ekki í fyrsta skipti sem ég hef þurft á slíkri hjálp að halda og hafa Gauti, Vala og Nökkvi hjálpað mér með svipuð skólaverkefni áður.  Mikið er ég nú heppin. 

p.s. í dag á ég sjálf afmæli og tek á móti árnaðaróskum milli kl. 18-22 að heimili mínu, Karfavogi 13.  Allir ungmennafélagar eru sérstaklega velkomnir  

Búið í bili
Adda afmælisstelpa